زانکۆیا نەورۆز ڕۆژا جیهانی یا تەندروستییا دەروونی ب ڕێڤەبرنا سیمپۆزیۆمەكێ بەرز ڕادگريت

بۆنەیا ڕۆژا جیهانی یا ساخله‌میا دەروونی، کو هەرسال ل 10ێ چريا ئێکێ دهێتە ساخكرن، پشکا دەرونناسيێ ل کۆلیژا زمانان یا زانکۆیا نەورۆز ب ئامادەبوونا هێژایان پ.د. هوگر تاهر تەوفیق هاریکارێ سەرۆکێ زانکۆیێ بۆ کاروبارێن کارگێڕی و قوتابیان؛ پ.د. موئەیەد ئەغالی میرزا هاریکارێ سەرۆکێ زانکۆیێ بۆ کاروبارێن زانستی و ڤەکۆلینێن ئەکادیمی؛ و پ.د. ئەمین عەبدولقادر عومەر راگرێ کۆلیژا زمانان و سەرۆکێ پشکا دەروونناسيێ و هژمارەکا رەوشەنبیر و قوتابی و مامۆستایان، سەمپوزیومەکا زانستی ل ژێر دروشمێ "ئارمانجەک، و هزار دیتن: ساخله‌میا دەروونی بۆ هەمیان" هاتە ڕێکخستن، ب مەبەستا بلندکرنا هشیاریا جڤاکی دەربارەی گرنگیا ساخله‌میا دەروونی و دیارکرنا ڕۆلێ پسپۆریێن زانستی و پیشەیی یێن جۆراوجۆر د پێشڤەبرن و باشترکرنا وێ دا. 

د سەمپوزیومێ دا کۆمەکا پسپۆر و شارەزایان ژ بوارێن جۆراوجۆر بەشدار بوون، وەک پزیشکێ دەروونی، چارەسەرکەرێ دەروونی، ڤەکۆلەرێ جڤاکی، پسپۆرێ پەروەردەیا تایبەت، هەروەسا پسپۆرێن هونەر و وەرزشێ. هەر پسپۆرەکی ڕۆلێ بوارێ خۆ د پێشڤەبرنا ساخله‌میا دەروونی، پشتگیریکرن ژ تێکچوونێن دەروونی و باشترکرنا کوالیتیا ژیانێ دا ڕوون کر. 

هەروەسا سەمپوزیومێ چەند پارچەیێن میۆزیکێ ب خۆڤە گرتن، کو ئارمانجا وان پێشڤەبرنا ئارامیا دەروونی و کێمکرنا گرژییا دەروونی بوو، دا کو کەشەکێ ئەرێنی و ئارام بۆ بەشداربوویان بهێتە دروستکرن. 

ژبلی ڤێ چەندێ، چالاکیەکا کارلێکەر هاتە ئەنجامدان، کو پێکدهات ژ تاقیکرنەکا سادە یا ساخله‌میا دەروونی ب ڕێکا کۆدێ (QR Code)، ل سەر شاشەیێ هاتیە نیشاندان. ئەڤ چالاکیە بوو ئەگەر کو بەشداربوو زێدەتر هزر ل دۆخێ خۆ یێ دەروونی بکەن و هشیاریا وان دەربارەی ساخله‌میا دەروونی بلند ببیت.

سەمپوزیومێ جەخت ل سەر گرنگیا هەڤکاریا دناڤبەرا پسپۆریێن پزیشکی، دەروونی، جڤاکی، پەروەردەیی، هونەری و وەرزشی دا کر، و ئەو بیرۆکە بەرچاڤ کر کو سەرەڕای جیاوازییا تیۆری و ڕێبازان، هەمی پسپۆريان ئارمانجەکا هەڤپشک هەیە، ئەو ژی پێشڤەبرنا ساخله‌میا دەروونی بۆ هەمیانە.