ل زانکۆیا نەورۆز، سمینارەك ل دۆر "چەوانیا دەرکەفتنا نیشانێن خەمۆکیێ" هاتە گێران.

ل رۆژا سێشەمبی ڕێکەفتی ١٨-١١-٢٠٢٥ ل دەمژمێر ١٠:٣٠ی سپێدێ، پشکا دەروونناسی ل کۆلیژا زمان سمینارەکا زانستی ل ژێر ناڤونیشانێ "چەوانیا دەرکەفتنا نیشانێن خەمۆکیێ" بۆ مامۆستایێ هاریکار عەلی عەبدولقادر محەمەد ڕێکخست.

مامۆستای ب تێر و تەسەلی ناڤەرۆکا بابەتێ خۆ شرۆڤە کر و دیار کر کو خەمۆکی نە بتنێ ڕەوشەکا دەروونی یا دەمکییە، بەلکو د بنەڕەت دا پرۆسەیەکا ئاڵۆزە کو د ئەنجامێ تێکچوونا هەڤسەنگیا ماددەیێن کیمیایی و گوهۆڕینێن دەماری د مێشکی دا دەستپێ دکەت؛ نەخاسما کێمبوونا ئەوان ڕێژەیێن بەرپرس ژ ڕێکخستنا مودی و دڵخۆشیێ وەک سێرتۆنین و دۆپامین، کو ئەڤە ژی ڕاستەوخۆ کار دکەتە سەر ئاستێ وزە و حەزا مرۆڤی بۆ ژیانێ.

زێدەباری هندێ، ئاماژە دا کو ئەڤ گوهۆڕینە هێدی هێدی کار دکەنە سەر لایەنێ هەستی و ناسینێ یێ کەسی، ب شێوازەکێ وەسا کو مرۆڤ هەست ب بەرزەبوونا هیڤیێ و کێمبوونا بهایێ خۆ دکەت، و ئەو کار و کریارێن جاران تام ژێ وەردگرت، ئێدی چ ڕامانێ ل دەڤ وی دروست ناکەن. د هەمان دەم دا، ئەڤ بارگرانییا دەروونی ڕەنگڤەدانەکا بهێز ل سەر جەستەی ژی دکەت، و د دەرکەفتنا نیشانێن وەک ماندووبوونا بەردەوام، تێکچوونا سیستەمێ خەوێ، و گۆڕانکاری د حەزا خارنێ و کێشا جەستەی دا دیار دکەت.

ل دوماهییێ، ئامادەبوویان دیتن و بۆچوونێن خۆ ل دۆر بابەتی دیار کرن و بابەت دەوڵەمندتر لێ کر.