زانکۆیا نەورۆز باشترین ئەنجام د دیرۆکا خۆ دا د پیڤەرێن "نایابی" و "کارتێکرن" یێن رێزبەندیا وێبۆمێتریکس دا بدەستڤە دئینیت

زانکۆیا نەورۆز دەستکەفتەکێ نوی د وەشانا تیرمەها ٢٠٢٦ێ یا رێزبەندیا وێبۆمێتریکس (Webometrics) یا جیهانی دا تۆمار کر، کو تێدا باشترین ئەنجام د دیرۆکا خۆ دا د هەردوو پیڤەرێن هەرە گرنگ یێن رێزبەندیێ دا (نایابی - Excellence) و (کارتێکرن - Impact) بدەستڤە ئینا.

زانکۆیێ پلەیا ٢,١٠٦ ل سەر ئاستێ جیهانێ د پیڤەرێ "نایابی" (Excellence) دا بدەستڤە ئینا، کو ئەڤە بلندترین پلەیە زانکۆ گەهشتبیتێ ژ دەما پشکداربوونا وێ د ڤێ ڕێزبەندیێ دا. ئەڤ پیڤەرە ب شێوەیەکێ سەرەکی کوالیتیا ڤەکۆلینێن زانستی و کارتێکرنا وان ل سەر ئاستێ نێڤدەولەتی دپیڤیت، ئەو ژی ب ڕێکا پشتبەستن ب وان ڤەکۆلینێن کو پترترین ئاماژە (Citations) پێ هاتییە کرن.

هەروەسا زانکۆیا نەورۆز باشترین ئەنجام د دیرۆکا خۆ دا د پیڤەرێ "کارتێکرن" (Impact) دا تۆمار کر و پلەیا ٣,٥٤٤ ل سەر ئاستێ جیهانێ بدەستڤە ئینا. ئەڤە وەرچەرخانەکا مەزنە، چونکی د وەشانا کانوینا ئێکێ ٢٠٢٦ێ دا پلەیا وێ ١٩,٢٥٠ بوو. ئەڤ پێشکەفتنە نیشانەکا رۆنە بۆ زێدەبوونا هەبوونا دیتجیتاڵی یا زانکۆیێ و بەرچاڤبوونا سایتێ وێ ب رێکا لینک و ژێدەرێن کو ژ لایێ سازیێن ئەکادیمی و سایتێن باوەرپێکری ڤە ئاماژێ ب زانکۆیێ ددەن.

ل سەر ئاستێ گشتی یێ ڕێزبەندیا وێبۆمێتریکس، زانکۆیا نەورۆز ژ پلەیا ١١,٢٢٢ د کانوینا ئێکێ ٢٠٢٦ێ دا پێشکەفت بۆ پلەیا ٨,٩١١ ل سەر ئاستێ جیهانێ د وەشانا تیرمەها ٢٠٢٦ێ دا، واتە د ماوێ تنێ شەش هەیڤان دا ٢,٣١١ پلەیان بەرەڤ پێشڤە چوو.

ڕێزبەندیا وێبۆمێتریکس هەلسەنگاندنێ بۆ زانکۆیان دکەت ل سەر بنەمایێ هندەک پێوەرێن کو هەبوونا دیتجیتاڵی، ڤەکریبوون د بەلاڤکرنا زانستێ دا، و کوالیتی و کارتێکرنا بەرهەمێ ڤەکۆلینێن زانستی دپیڤن. ئەڤ ڕێزبەندیە ئێکە ژ ناڤدارترین ڕێزبەندیێن نێڤدەولەتی یێن زانکۆیان ل جیهانێ.

زانکۆیا نەورۆز ڤان دەستکەفتان ب بەرهەمێ بزاڤێن خۆ یێن بەردەوام دزانیت بۆ ب هێزکرنا ژێرخانا دیتجیتاڵی، بلندکرنا ئاستێ کوالیتیا ڤەکۆلینان و بەرفرهکرنا پێگەهێ خۆ یێ ئەکادیمی ل سەر ئاستێ دەڤەرێ و جیهانێ. زانکۆ یا بەردەوامە د کارکرنێ دا بۆ باشترکرنا ئەدایێ خۆ د هەمی پیڤەرێن وێبۆمێتریکس دا د وەشانێن بهێت دا.