دوازدەمین کۆنفرانسێ زانستیێ ناڤدەولەتیێ زانستێن مرۆڤایەتى و جڤاکى ل زانکۆیا نەورۆز هاتە گێران

ل رۆژا چارشەمبێ رێکەفتى (3/6/2026) ل دەمژمێر (10:00) سپێدێ، ب ئامادەبوونا بەرێز د. صباح ئیبراهیم وەیس راوێژکارێ وەزیرێ خواندنا بلند و ڤەکۆلینێن زانستى، پ. د. موئەیەد ئەغالى میرزا و پ. د. هۆگر تاهر تەوفیق هاریکارێن سەرۆکێ زانکۆیێ، راگرێن کۆلیژان، مامۆستا و ڤەکۆلەرێن هێژا، دوازدەمین کۆنفرانسێ زانستیێ ناڤدەولەتیێ زانکۆیا الامام المهدي الحكومية/ السودان و سەنتەرێ ریماح یێ ڤەکۆلین و پێشئێخستنا ژێدەرێن مرۆڤى - ئوردن، ل هۆلا رەحمى هەکارى ل زانکۆیا نەورۆز هاتە گێران. 

د پەیڤەکێ دا هاریکارێ سەرۆکێ زانکۆیێ پ. د. موئەیەد ئەغالى میرزا، ب خێرهاتنا ڤەکۆلەران بۆ کوردستانێ و باژێرێ دهۆکێ کر و ھیڤیا ئەوێ چەندێ خواست کو مژار و ڤەکۆلینێن وان خزمەتا مرۆڤایەتیێ و پێشئێخستنا بیاڤێ ڤەکۆلینێن ئەکادیمى بکەن. 

ژ لایێ خۆ ڤە راوێژکارێ وەزیرێ خواندنا بلند و ڤەکۆلینێن زانستى د. صباح ئیبراهیم وەیس ب ناڤێ وەزیرێ خواندنا بلند دوبارە ب خێرهاتنا ڤەکۆلەران ژ سەرانسەرى وەلاتێن عەرەبى بۆ باژێرێ دهۆکێ کر، راوێژکارى ئاماژە ب ئەوێ چەندێ دا، کو گرنگە کۆنفرانسێن ژ ئەڤى رەنگى ب ئارمانجا خورتکرنا تێکەلیێن زانستى د ناڤبەرا زانکۆ و سەنتەرێن ڤەکۆلینان دا بەردەوام بن. 

د کۆنفرانسێ ناڤبری دا، ڤەکۆلەر ژ وەلاتێن عەرەبى یێن جوداجودا پشکدارن و دێ بۆ دەمێ دو رۆژان ب شێوەیێ "ئامادەبوون و سەرهێل" ڤەکۆلینان ل دۆر مژارێن گرنگ یێن زانستێن مرۆڤایەتى و جڤاکى پێشکێش بکەن.