ئەڤرۆ ڕێکەفتی (7-10-2025) مامۆستایا زانکۆیا نەورۆز (روندك صالح زكر) ل پشکا كارگێرى کار ل کۆلیژا کارگێڕی و ئابووری، سیمینارەکێ زانستی پێشکێکر ل ژێر ناڤ و نیشانێن پۆلێنکرنا مەعریفی یا بلوم (Bloom’s Taxonomy)، یا کو ژ لایێ بنیامین بلوم و هەڤالێن وی ڤە ل سالا 1956 هاتییە دانان، ب مەرەما پۆلێنکرنا ئارمانجێن فێرکرنێ بۆ شەش ئاستێن ل دیڤ ئێک، دگەل زانینا سادە دەستپێدکەت و ب هەلسەنگاندن و داهێنانێ دووماهی دهێت.
وئاماژە کر، کو ل سالا 2001، ئهندرسۆن و کراتوهل ئەڤ پۆلێنکرنە دیسان داناڤە و کرە ئامرازەکێ پراکتیکی کو ڕەهەندێن زانینێ و پرۆسەیێن مەعریفی ڤەدگرت، و ئاست ژ ناڤان بوونە کریار: (ژبەرکرن، تێگەهشتن، بجهئینان، شیکارکرن، هەلسەنگاندن، داهێنان).
هەروەسا هاتە دیارکرن کو ئەڤ پۆلێنکرنە ب مەرەما وێ چەندێ یە هاریکاریا مامۆستایان بکەت بۆ دانانا ئارمانجێن فێرکاری یێن دیار، و ئاراستەکرنا چالاکیان دا هەمی ئاستێن بیرکرنێ ڤەگرن، و هەلسەنگاندنا قوتابیان ب شێوەیەکێ دروستتر. د ڤی سيمينارێ دا ئەڤ پۆلێنکرنە د فێرکرنا زانکۆیێ دا هاتییە بکارئینان، ب ڕێیا ستراتیژیێن جودا وەکو: تیمێن کارێ، حەوزێ ماسیان، هەلسەنگاندنا ژ لایێ هەڤالان ڤە، فێرکرنا لسەر بنەمایێ پرۆژەیان، و ڤەکۆلینکرنا حالەتان.
