ل زانکۆیا نەورۆز سمینارەک ل دۆر "ئۆتۆماتیککرنا سیستەمێ کارگێڕی و کاریگەریا وێ ل سەر رەوشا یاسادانانێ" هاتە سازکرن

د چارچۆڤێ بزاڤێن بەردەوام دا بۆ بهێزکرنا لڤینا زانستی و ئەکادیمی و هەڤچەرخکرنا پێشکەفتنێن تەکنەلۆژی یێن سەردەم، کۆلیژا یاسا و زانستێن سیاسی ل زانکۆیا نەورۆز، ڕۆژا شەمبی ڕێکەفتی ٣١ـی چریا ئێکێ ٢٠٢٦ـێ، سمینارەکا زانستی یا تایبەتمەند ژ لایێ (د. بەهدین شەهاب ئەحمەد) ڤە ل ژێر ناڤونیشانێ "ئۆتۆماتیککرنا سیستەمێ کارگێڕی و کارتێکرنا وێ ل سەر ڕەوشا یاسادانانێ" پێشکێش کرد سمینارێ دا، ڤەکۆلەری بەحس ل ئاسۆیێن بەرفرەهکرنا بوارێن کارگێڕیا ئەلیکترۆنی و چەوانیا ڕەنگڤەدانا وان ل سەر پێکهاتەیێ یاسادانانێ یێ نها کر، د ڕۆناهیا وان پێشکەفتنێن بلەز یێن د بوارێن تەکنەلۆژیا و زیرەکیا دەستکرد دا ڕووددەن. ناڤبری تەکەز کر کو ئارمانجا سەرەکی ژ ڤەگوهاستنا دیجیتالی د کێمکرنا ڕۆتین و بیرۆکراسیەتێ، زێدەکرنا ئاستێ شەفافیەتێ، و پاراستنا بەلگەنامەیێن فەرمی ژ ژناڤچوون و بەرزەبوونێ دا خۆیا دبیت هەروەسا ڕۆناهی خستە سەر گرنگترین ئاستەنگ و مەترسیێن کو ڕووبڕووی کارگێڕی و تاکەکەسان دبن، و ئاماژە ب مەترسیێن هێرشێن ئەلیکترۆنی (سایبەری) و هاککرنێ، و کێماسیێن یاسایی یێن هەیی د چارەسەرکرنا ڤی شێوازێ نوی یێ ڕێکخستنا کارگێڕی دا کر. د هەمان دەم دا، د سمینارێ دا بەحس ل دەرئەنجامێن جڤاکی و ئابووری یێن ئۆتۆماتیککرنێ هاتە کرن، وەک کارتێکرنا وێ یا پێشبینیکری ل سەر ڕێژەیا بێکاریێ، و پشتگوهـ هاڤێتنا هندەک تەخێن جڤاکی وەک دانعەمران و وان کەسێن کو شارەزایی د تەکنەلۆژیا سەردەم دا نینە سمینارێ کارڤەدانەکا بەرفرەهـ و دانوستاندنێن زەنگین ژ لایێ مامۆستا و ڤەکۆلەرێن بەرهەڤبوویی ڤە ب خۆڤە دیتن، کو تێدا چەندین دیتن و پێشنیار هاتنە ئاراستەکرن ب مەرەما دیتنا هەڤسەنگیەکا دروست د ناڤبەرا ڤەگوهاستنا دیجیتالی، پاراستنا مافان، و پێشخستنا یاسایان دا.