سەرۆكێ زانكۆیا نەورۆز دگەل بەرپرسێن کونسولخانەیا ئەمریکی دەلیڤەیێن هەڤکاریا ئەکادیمی گەنگەشە دکەت
د دەمێ سەرەدانا خۆ دا بۆ واشنتۆنا پایتەختێ ئەمریکا، سەرۆکێ زانکۆیا نەورۆز، پ. هـ .د. مێڤان عارف عەبدولرەحمان، دگەل خاتین کیم سترۆلۆ، بەرپرسا کاروبارێن کەلتووری و پەروەردەیی و راگەهاندنێ ل کونسولخانەیا گشتی یا وەلاتێن ئێکگرتی یێن ئەمریکا ل هەولێرێ کۆم بوو، ب ئامادەبوونا جێگرا وێ خاتین سندوو چیدەمبرەم، و رێزدار رێڤینگ مزوری، شێوەرمەندێ خواندنا بلند ل کونسولخانەیا گشتی یا وەلاتێن ئێکگرتی یێن ئەمریکا ل هەولێرێ، یێ کو بەردەوامە د پشتەڤانیکرنا وان دەستپێشخەریان دا یێن کو ئارمانج ژێ بهێزکرنا هەڤکاریا ئەکادیمی و فێرکرنێ دناڤبەرا سازیێن ئەمریکی و دەزگەهێن خواندنا بلند ل هەرێما کوردستانێ.
د دیدارێ دا رێکێن موکمکرنا هەڤکاریا ئەکادیمی و رەوشەنبیری دناڤبەرا زانکۆیا نەورۆز و سازیێن فێرکرنێ یێن ئەمریکی دا هاتنە باسکرن، دگەل گەنگەشەکرنا دەلیڤەیێن ئالوگۆرا ئەکادیمی و بەرنامەیێن پێشخستن و راهێنانێ، یێن کو دبنە ئەگەرێ پشتەڤانیکردنا قوتابی و مامۆستایان و بەرفرەهکرنا ئاسۆیێن هەڤکاریا نێڤدەولەتی یا زانکۆیێ.
هەروەسا د گەنگەشەیان دا باس ل میكانیزمێن بهێزکرنا پەیوەندیان د ناڤبەرا زانکۆیا نەورۆز و لایەنێن فێرکرنێ و رەوشەنبیری یێن ئەمریکی دا هاتە کرن، و لێگەران ل دەلیڤەیێن نوی بۆ هەڤکاریێ د بیاڤێن ئەکادیمی و زانستی یێن هەڤپشک دا.
هەردو لایەنان جەخت ل سەر گرنگیا بەردەوامیا پەیوەندی و هەماهەنگیێ کر ب شێوەیەکێ کو ببیتە ئەگەرێ ئاڤاکرنا هەڤپشکیێن کارا و بەردەوام، و پشتەڤانیا بزاڤێن زانکۆیا نەورۆز بکەت بۆ موکمکرنا پێگەهێ خۆ یێ نێڤدەولەتی و ڤەکرن ل سەر دەزگەهێن ئەکادیمی یێن ناڤدار ل ئەمریکا و جیهانێ.
ئەڤ دیدارە د چارچووڤەیێ بزاڤێن بەردەوام یێن زانکۆیا نەورۆز دا دهێت بۆ بەرفرەهکرنا تۆرێن پەیوەندیێن خۆ یێن نێڤدەولەتی و لێگەران ل دەلیڤەیێن نوی بۆ هەڤکاریێ دگەل دەزگەهێن فێرکرنێ و ئەکادیمی یێن جیهانی، دا کو ببیتە ئەگەرێ پێشخستنا ژینگەها فێرکرنێ و ڤەکۆلینان ل زانکۆیێ و ڤەکرنا ئاسۆیێن بەرفرەهتر ل پێشیا قوتابی و مامۆستایێن وێ.