قوتابیێن زانکۆیا نەورۆز پشکداری د خولەکا چڕ یا ئاسایشا سایبەری (Cybersecurity) دا کر

دو قوتابیێن کۆلێژا زانست ل زانکۆیا نەورۆز پشکداری د خولەکا چڕ یا ئاسایشا سایبەری دا کر، ئەوا ژ لایێ ئەکادیمیا سیسکۆ(Cisco Academy) ل زانکۆیا پۆلیتەکنیک یا دهۆک هاتبوو ڕێکخستن. خولێ ٣٢ قوتابی و دەرچوویێن زانکۆ و پەیمانگەهان ل سەرانسەری پارێزگەها دهۆکێ کۆمڤەکرن.

 هەردوو قوتابی (ئاری طيب کيف الله - قووناغا سێیێ)، و (إسراء ئازاد على – قووناغا دوێ) و ب سەرپەرشتییا مامۆستا (شەنگ هەلات عارف) نوینەرایەتیا زانکۆیا نەورۆز کربوون. 

خول ژ ٦٠ دەمژمێرێن ڕاهێنانا تیۆری و کرداری پێکهاتبوو، کو تێدا بابەت و شارەزاییێن تایبەتمەند د بواری ئاسایشا سایبەری دا هاتنە شرۆڤەکرن. ئارمانجا خولێ بەرفرەهکرنا شیانێن کرداری یێن پشکداربوویان و زێدەکرنا پێزانینێن وان ل سەر تەکنەلۆجیایێن نوی د ڤی بواری دا بوو، ب ئاوایەکێ کو دگەل پێدڤیێن کەرتێن گشتی و تایبەت دگونجیت.

خول ل ڕۆژا پێنج شەمبی ١٧ێ ئەیلوولا ٢٠٢٦ێ ب ئامادەبوونا بەرپرس، سەرپەرشت و ڕاهێنەرێن زانکۆیا پۆلیتەکنیکی یا دهۆک ب داوی هات، و ل دوماهیا بەرنامەی باوەرنامەیێن پشکداریکرنێ ب پشکداربوویان هاتە دان.

ب ڤێ هەلکەفتێ، سەرۆکێ زانکۆیا نەورۆز، پ.هـ. د. مێڤان عارف عبدالرحمن، پێشوازی ل هەردو قوتابیان و سەرپەرشتا وان مامۆستا شەنگ هەلات عارف کر و دەستخۆشی ل پشکداریکرنا وان د خولێ دا کر. ناڤهاتی جەخت ل سەر گرنگیا ڤان جۆرە بەرنامەیان د گەشەپێدانا شارەزاییێن قوتابیان دا کر، دا کو بشێن ب رەنگەکێ سەردەمیانە پێشڤەچوونێن تەکنەلۆجی و پێدڤیێن بازارێ کاری شارەزا ببن.

ئەڤ پشکداریکرنە ڕەنگڤەدانا پێگەهێ زانکۆیا نەورۆزە د پشتەڤانیکرن و هاندانا قوتابیێن خۆ دا، دا کو مفایی ژ دەرفەتێن ڕاهێنانا زانستی و پیشەیی وەربگرن، کو زانیاریێن ئەکادیمی دگەل ئەزموونا کرداری گرێددەن و شیانێن وان د وارێن تەکنەلۆجی یێن پاشەرۆژێ دا بۆ بهێز دکەن.