راگەهاندنا فەرمى: دەستپێکرنا گۆڤارا رۆژهەلاتا ناڤین یا زانستێن جڤاکى (MJSS)

ئەم دلخۆشین ب راگەهاندنا دەستپێکرنا فەرمى یا گۆڤارا رۆژهەلاتا ناڤین یا زانستێن جڤاکى (MJSS)، کو گۆڤارەکا ئەکادیمی یا خودان پێداچوونا زانستی یە (peer-reviewed) و تایبەتە ب پێشئێخستنا ڤەکۆلینێن کوالێتیا بلند د بیاڤێن جوداجودا یێن زانستێن جڤاکى دا.

ئەڤ گۆڤارە ب شانازی ڤە ل ژێر چاڤدێریا زانکۆیا نەورۆز هاتیە دامەزراندن و ئارمانجا وێ ئەوە ببیتە ناڤەندەکا کارا بۆ زانا، ڤەکۆلەر و شارەزایان، داکو ڤەکۆلینێن خۆ یێن کاریگەر و داهێنەرانە یێن گرێدای ب ئالۆزیێن دەڤەرێ و جیهانی بەلاڤ بکەن.

گۆڤارا MJSS ب کۆدێ ناڤدەولەتی یێ DOI هاتیە تۆمارکرن، ب ئەڤێ چەندێ ژی هەمی بابەتێن دهێنە بەلاڤکرن دێ ناسنامەکا دیجیتالی یا هەمیشەی هەبیت بۆ ب ساناهی دیتن و دیارکرنا ژێدەران ل سەر ئاستێ جیهانی. هەروەسا گۆڤار د ئیندێکسێ Islamicus دا هاتیە تۆمارکرن، کو ئەڤە ژی دێ بیتە ئەگەرێ بلندبوونا پێگەهێ وێ یێ ئەکادیمی د ناڤ جڤاکێن ڤەکۆلینا ناڤدەولەتی دا.

ب هەڤکاری ل گەل دەزگەهێ چاپ و بەلاڤکرنا ئەکادیمی یێ ناڤدەولەتی یێ ناڤدا  (Brill)، گۆڤارا MJSS پابەندە ب بلندترین پیڤەرێن بەلاڤکرنا زانستی، دەسپاکی د پێداچوونێ دا و پێشەنگی د کارێ سەرنڤیسەری دا. ئەڤ گۆڤارە ژ لایێ دەستەکەکا سەرنڤیسەران یا خودان ئەزموون و خودان شیان ڤە دهێتە پشتەڤانیکرن، کو ژ ڤەکۆلەر و شارەزایێن چەندین وەلاتێن جودا پێکدهێت، ئەڤە ژی رەنگڤەدانا لایەنێ وێ یێ ناڤدەولەتی و پێگیریا وێ ب کوالێتیا بلندە.  

ئەم نوکە ب فەرمی دەرگەهێ وەرگرتنا بابەتان ڤەدکەین و ب گەرمی داخوازێ ژ ڤەکۆلەر، ئەکادیمی و شارەزایان دکەین، کو ڤەکۆلینێن خۆ یێن رەسەن بۆ مە بهنێرن. وەرگرتنا بابەتان هەمی پشکێن زانستێن جڤاکی بخۆڤە دگریت، ب تایبەت ئەو ڤەکۆلینێن کو پتر ژ بیاڤەکێ زانستی د ناڤ خۆ دا کۆم دکەن و یێن کو گرێدای ب کاروبارێن دەڤەرێ ڤە هەی.

ڤەکۆلەر دشێن بابەتێن خۆ ب رێکا سیستەمێ ئۆنلاین یێ گۆڤارێ ل سەر ئەڤی لینکی بهنێرن:

https://www.editorialmanager.com/mjss/default.aspx

ئەم ل هیڤیا پشکداریا هەوە یا ب مفاینە بۆ زەنگینکرنا دانوستاندنێن ئەکادیمی ب رێکا گۆڤارا MJSS.