زانکۆیا نەورۆز پشکداری د کۆربەندێ تەلارسازی یێ "ژ خواندنێ بۆ پراکتیکێ" دا دکەت و قوتابییەکا زانکۆیێ پلەیا ئێکێ د پێشبڕکێیا دیزاینێ دا بدەستڤەدئینیت

ل ڕۆژا ئێکشەمبی ڕێکەفتی ٨ـی چریا دووێ ٢٠٢٦ێ، شاندەکێ زانکۆیا نەورۆز ب سەرۆکایەتییا سەرۆکێ زانکۆیێ، پ. هـ. د. مێڤان عارف عبدالرحمن، و ب ئامادەبوونا ڕاگرێ کۆلێژا ئەندازیاری، پ. د. عەلی حیدر سعد، دگەل ژمارەیەکا مامۆستا و قوتابییێن کۆلیژێ، پشکداری د کۆربەندێ ئەندازیاریا تەلارسازی دا کر، ئەوا ب دوریشمێ "ژ خواندنێ بۆ پراکتیکێ" ل سەنتەرێ کۆنفرانسان ل زانکۆیا دهۆك هاتییە ڕێکخستن.

کۆربەند ب هەڤکاری دگەل سەندیکا ئەندازیاران لقێ دهۆك هاتبوو ئامادەکرن، ب ئامادەبوونا سەرۆکێ زانکۆیا دهۆك د. داود سلێمان ئەتروشی، جێگرا بەرپرسێ مەکتەبا ڕێکخستنا پارتی دیموکراتی کوردستان ل بەهدینان د. ڤیان سلێمان، جێگرێ پارێزگارێ دهۆكێ ڕێزدار ماجد سەید سالح، ڕێڤەبەرێ گشتی یێ وەبەرهێنانێ ل پارێزگەها دهۆكێ ڕێزدار هەڤال سەدیق، سەرۆکێ سەندیکا ئەندازیاران لقێ دهۆك ئەندازیار عەلی نیعمەت، و ژمارەیەکا بەرچاڤ ژ مامۆستا و ڕاگر و قوتابییان.

تەوەرێن کۆربەندی دوو پانێلێن زانستی بخۆڤەگرتن؛ د پانێلا ئێکێ دا گەنگەشە ل سەر ڕەوشا تەلارسازی ل دەڤەرێ هاتە کرن، و د پانێلا دووێ دا ئاریشە و ئاستەنگێن ل بەرامبەر ئەندازیارێن دەرچوویێن نوو دگەل بازاڕی و کەرتێ تایبەت هاتنە گەنگەشەکرن.

د ڤی کۆربەندی دا، قوتابییێن بەشێ تەلارسازی ل زانکۆیا نەورۆز ب ئاستەکێ بلند پشکداری د پێشبڕکێیا دیزاینێ دا کر، ئەوا ژلایێ ئینستیوتا ئەمریکی (AIAS) هاتبوو ڕێکخستن. د ئەنجامدا، قوتابیا زانکۆیا نەورۆز (وەفا جمیل جاسم) شییا پلەیا ئێکێ (سەرکەفتیا پێشبڕکێیێ) بدەستڤه‌بینیت و ڕێزلێنان ل سەر شیان و دیزاینا وێ یا سەرکەفتی هاتەکرن.

پشکداریکرنا زانکۆیا نەورۆز د چالاکیێن ب ڤی ڕەنگی دا دچیتە د چوارچۆڤێ ستراتیجییەت و ئارمانجێن زانکۆیێ دا ژبۆ ئامادەکرنا قوتابییان ب زانینەکا ئەکادیمی و شارەزاییەکا پراکتیکی تا بشێن ب ئاستەکێ بلند بچنە د ناڤ بازاڕێ کاری دا و خزمەتا جڤاکی بکەن.