پڕۆفیسۆر عەبدوڵڵا فازل حامید، ژ سالا ٢٠٢٣ێ وەرە پلەیا پڕۆفیسۆری د قانونا نێڤدەولەتی یا تایبەت دا هەیە. ناڤبری ژ سالا ٢٠٠٦ێ ڤە مامۆستایێ ئەکادیمییە ل زانکۆیێن هەرێما کوردستانا عیراقێ. وانەیێن قۆناغا بەکالۆریۆسێ دگۆتێ، ژ وان ژی: قانونا نێڤدەولەتی یا تایبەت، گرێبەستێن مەدەنی، مافێن عەینی، دادبینییا مەدەنی (المرافعات)، و ئەحکامێن پابەندبوونان (الالتزامات). هەروەسا مامۆستایێ خواندنا بلندە ل زانکۆیێن هەرێما کوردستانێ و سەرپەرشتییا چەندین نامەیێن ماستەر و تێزێن دکتۆرایێ کرییە. زێدەباری ڤێ چەندێ، سەرۆکایەتی و ئەندامییا چەندین لژنەیێن گەنگەشەکرنا نامەیێن ماستەر و دکتۆرایێ ل زانکۆیێن هەرێما کوردستانێ و عیراقێ کرییە. ب دەهان ڤەکۆلین د بوارێ قانوونا تایبەت دا، ب تایبەتی قانونا نێڤدەولەتی یا تایبەت، د کۆڤارێن ئەکادیمی یێن عیراقی و عەرەبی دا بەلاڤکرینە. خودانێ پەرتووکا (القانون الدولي الخاص - الجزء الثاني) یە، کو پەرتووکەکا پەسەندکرییە ژ لایێ وەزارەتا خواندنا بلند و ڤەکۆلینێن زانستی ل هەرێما کوردستانێ. پڕۆفیسۆر حامید، دگەل کارێ خۆ یێ زانستی، پشکداری ب ڤەکۆلینێن خۆ د گەلەک کۆنفرانسێن زانستی دا ل سەر ئاستێ عیراقێ و وەلاتێن عەرەبی کرییە. هەروەسا چەندین پۆستێن کارگێڕی ل کۆلێژا قانونێ ل زانکۆیا دهۆکێ وەرگرتینە، ژ وان ژی: سەرۆکێ پشکێ، ڕێڤەبەرێ یەکەیێ خواندنا بلند، و ڕێڤەبەرێ سەنتەرێ ڤەکۆلینێن قانونی و سیاسی. نوکە ژی هاریکارێ ڕاگرێ کۆلێژا قانونێ یە بۆ کاروبارێن کارگێڕی ل زانکۆیا دهۆکێ.